It's Deja Vu All Over Again

Manera tawata di spera, cos ta hopi hot den parlamento den e dianan aki rond di tur e discucion tocante cambio di ley di BBO. Segun nos por comprende di nos senior parliament analyst e fraccion di AVP kier pusha pa trata e ley prome cu fin di aña, mientras e parlamentarionan di MEP ta pidi mas tempo pa studia e ley aki.

Pregunta: CUANTO TEMPO BO MESTER PA STUDIA UN LEY DI 1 PAGINA????

E parlamentarionan di MEP tawata sa di 26 di september 2009 caba cu e ley aki lo wordo introduci y dus tawata tin tempo suficiente pa studia e cambio aki. By the way, pa boso informacion e 3% a cambia pa 1.5%.

En fin, pa nos di PA tur esaki ta zona masha conoci mes. Ta manera un deja vu cu ta hiba nos bek na un momento cu ta jena nos cu orguyo na december 2006. E eventonan cu a sosode riba e dia ey ta skibi masha detaya akinan. (Pa esaki nos kier a manda un danki special na nos ex-colega blogger Edwin Jacobs).
Un cos ta sigur. Sr. Andy Lee no ta bai lanta for di e stoel ey pa nada.

E Mundo Riba Su Cabez

Na final di aña 2006 Aruba tawata den un situacion caminda e partido na mando (MEP) tawata preparando pa introduci e ley di BBO contra tur conseho di tur instancia relevante aki na Aruba. Awe apenas 3 aña despues e partido MEP ta criticando e partido na mando (AVP) paso nan ta introduciendo un cambio den e ley di BBO pa rebaha esaki contra tur conseho di instancianan concerni.

Besides di e obvious hypocrecia aki, laga nos analysa esaki un rato. Hopi hende ta pensa cu e proposicion di AVP pa baha BBO na 1.5% ta uno masha humilde y ta di aplaudi. Y pues MEP ta e boos-doener akinan. Pero con cu bo mirele MEP tin un punto valido si. E rebaho di BBO lo no tin e effecto cu nos tur ta kere cu e lo tin....cual ta rebaho di prijsnan en general. Esaki ta solamente un di e criticanan cu tin contra di e rebaho di BBO. Tin otro expertonan manera Ben Marapin cu tambe a critica e proposicion di rebaha BBO sin reemplaza esaki cu algo otro.

Un di criticonan mas fuerte contra e proposicion di AVP pa rebaha e BBO ta sra. Evelyn Wever-Croes di partido MEP cu a cataloga e proposicion aki como un "Mentira" di AVP. Sra. Wever-Croes ta sigui bisa cu e concepto di ley ta 1 pagina so y cu Raad van Advies a saca un advies sumamente devastador pa cu e concepto di ley aki. UN PAGINA SO?? Bo por kere?
Pregunta: Cuanto pagina Sra. Wever-Croes ta kere cu lo mester mas of menos pa cambia 3% na 1.5 %?

E advies negativo di Raad van Advies segun Sra. Wever-Croes ta consisti di no menos cu 4 pagina. E concepto di ley aki segun e parlamentario ta un BERGUENZA. En berdad, un berguenza compara cu 10 paginanan di conseho negativo di Raad van Advies pa cu introducion di BBO 3 aña pasa. Y esey no ta ni inclui advies negativo di SER ainda manera si tawata e caso na December 2006.

Akinan nos tin cu duna e parlamentario di MEP tur su razon. Ora ta trata di berguenza AVp ta keda hopi atras compara cu MEP.

Zzzzzzz

E trabou mas essential di un parlementario ta controla e begroting di gobierno annualmente. Un parlamentario tin hasta e derecho pa hasi cambio den e presupuesto presenta. PA por prueba cu e ex-parlamentario cu nan a hanja drumi na cruzada marduga lo tabata drumi den dia den parlamento tambe. Cu su mal custumber di bisa vooooor pa tur cos di gobierno e pober a aproba e begroting di e anja aki sin nota cu no presupuesta su futuro trabou na e departamento di su gusto. Un cos PA sa sigur cu ta den accountancy sigur nan lo no tuma e caballero aki.

Feisbuk (no ta tiepfaut)

Na nos hermana isla Corsou tabata tin entregramento di lista pa e elecion cu ta bai tuma luga Januari benidero. Entere e 11 partidonan cu ta bai participa tabata tin un partido nobo cu a hala PA su atenshon cual ta e partido Feisbuk (y no Facebook) cu su unico intregante e senor Yves Cooper. PA ta spera cu sr Cooper a tuma na cuenta si cu riba Facebook ta maximal 5000 friends so un hende por tin y cu somehow e tin cu busca 300 friends pa e por yega na e 5300 firma necesario pa participa na e elecion, sino cos lo pinta skur pa su partido.

Curashi Ta Siqui Challenge

Durante temporada di campaña Juan David Irausquin a sali cu e slogan "Curashi" y e la laga sa cu e tawata campaña pa sinta den Parlamento pa controla actonan di gobierno. Sr. Irausquin a bisa di tin e curashi pa questiona e gobierno hasta si esaki ta su mesun partido.

Siman pasa nos por a mira con Sr. Irausquin a jega Parlamento riba un bicicleta y asina laga tur hende babuca pa e action aki. Hopi ta esnan cu ta kere cu Sr. Irausquin ta hasi esaki pa su salud, medio ambiente y pa spaar gasolin so, pero tin mas tras di esaki. E motivo principal di esaki ta un otro challenge cu e kier trece den parlamento pa cu su mesun partido. Den e caso aki su mesun lider cu durante campaña a purba di hasi como si fuera cu e tin medio ambiente na pecho door di core parada di campaña riba un vehiculo cu lo ta spaar mas gasolin.


E acto di Sr. Irausquin akinan a pone e bala bek den scochi di e ministernan di su gobierno pa wak kiko nan ta bai hasi awo pa contra-aresta su challenge.

Ela pasa caba???

Nos por a tuma nota cu dos candidato di AVP no a ricibi e memo informando nan cu eleccion a termina y cu nan a wordo nombra como minister. Aparentemente ainda nan ta pasando door di nan to-do list di un politico arubiano.

Porta E-Man tin cu spierta nan, mirando cu e si no ta ser mira mas den compania di niun anciano, baby of persona cu deficiencia mental desde cu ela bira minister, pero a dicidi di anda cu un crowd completamente diferente.

Perfect timing....??

- "E ta masha rabia cu ela haya number 16!!"
- "Nel kier rejuvenece e partido."
- "E kier dedica mas tempo na su famia y su negoshinan."

Esey ta djies algun di e motibonan cu a ser menciona den pueblo dia cu Sr. Werleman a anuncia di lo pone un punto tras di su carera politico.

Cua cu por ta e motibo, nos mester bisa cu su timing tabata perfecto si. Ki "coincidencia" cu net despues cu ela tuma e decision dificil di retira for di politica, ela haya un oportunidad tremendo asina pa bira director di Utilities N.V.; bai tin "suerte"!!

Digitalisacion di Parlamento

Na aña 2007 parlamento a cuminsa cu un proceso di digitalisacion cu drs. Mervin Wyatt Ras ta considera masha importante pa su sucessor sigui cune. A introduci entre otro un "Documentenmanagementsysteem" di Blackberry Solutions. Esaki hunto cu un sistema di e-mail ta hasi posibel cu parlamentarionan por ricibi invitacionan pa reunionan den parlamento y ricibi nan mail "real time" ariba nan Blackberry.

Nos di PA a ripara berdad cu e systema nobo aki a trece problemanan di adaptacion cu ne pa cu algun parlamentario pasobra constantemente nan tawata riba nan Blackberry durante reunionan di parlamento. Pero e digitalisacion aki a trece tambe cu ne hopi eficiencia. Manera por ehempel Mike Eman por a "Reject" mas facil tur e reunionan cu e no lo atende y "Forward" esakinan pa su futuro voorzitter di parlamento Andy Lee.

Segun Sra. Wyatt Ras: "Importante den e proceso di digitalisacion ta cu ela hisa e calidad y eficiencia den trabow di Griffie y di Parlamento". Esaki tambe ta berdad paso awor Sr. Booshi Wever por manda Sr. Rudy Lampe un PIN message cu e palabranan "PEDOFIEL" enbez di grita esaki den parlamento. Dus un adelanto hopi visible den e calidad di nos parlamento.

Sra. Wyatt Ras ta bisa si cu e ta un reto pa cambia e mentalidad di e parlamentarionan pa envez di pidi tur documento ariba papel pa nan hasi uzo di e forma digital. Si nos repasa e To-do list di un politico, nos ta ripara cu esaki lo tin como consequencia cu lo mester usa un laptop por ehempel ora di "Revela Documento Comprometedor".

Ken no a hasi su huiswerk?

Siman pasa dia 22 di october nos por a lesa den Awemainta cu Evelyn Wever-Croes tawata masha desapunta cu algun politico cu a priminti shelo y tera y awo ta parce cu nan ta bin cu argumentonan foto cu "Nan no tawata sa con malo e situacion tawata". E politiconan aki no por a hasi nan huiswerk bon.

Cu e declaracion aki Sra. Wever-Croes tawata referi specificamente na Mike Eman cu di basta trempan a cuminsa anuncia cu e la haña sorpresa di su bida ora Director di Finansas a informe cu Aruba tin un deficit di 97 miyon florin. So far, nada nobo paso tur gobierno nobo cu sinta ta usa e mesun excusa pa cuminsa e proceso di "suavisamento di nan promesanan".

Pero tin mas politico cu tampoco a hasi nan huiswerk y tambe lo cai den e categoria di politiconan cu no ta serio segun Sra. Wever-Croes. Nos por menciona entre otro:

- Nilo Swaen cu a pensa cu paso Fitch Rating a re-afirma e credit rating di Aruba como un BBB cu tur cos ta bon cu e maneho financiero di gobierno.

- Marisol Tromp cu a pensa cu scolnan no tin mester di mantencion rutinario y tur cos lo keda den bon estado....te ora a bai hasi renobacion y a ripara cu ful e dak y plafond di Colegio Arubano San Nicolas mester wordo reemplaza di inmediato.

- Y ken por lubida e lider cu mas cu 30 aña di experiencia Nel Oduber cu a pensa cu su partido lo gana elecion di 25 di september cu nada menos cu 12 asiento.

Ta ora pa cuminsa parti strafwerk!!!

Ken ta Sigui Bon Ehempel di Prome Minister?

Recientemente Sr. Nel Oduber a dicidi di hala atras y sede su puesto den parlamento na Xiomara Ruiz-Maduro. E decision aki a bin despues di a analysa e motibonan di con su partido a perde eleccion di 25 di september. Despues di a sirbi su pais y e partido MEP pa mas cu 30 anja Sr. Oduber a entrega su puesto den parlamento dunando asina un bon ehempel na e otro candidatonan di su partido.

Na mes momento Sr. Oduber ta spera cu mas candidato riba su partido sigui su ehempel y duna espacio na e generacion nobo di MEP. Nos di PA por a compila e sigiente reaccion di e candidatonan menciona.

Cambio den Partido MEP

Despues di un derota devastador pa e partido MEP den eleccion di 25 di september ultimo e yamadonan pa cambio interno den e partido a bira mas fuerte. Esaki especialmente entre e generacion nobo di MEP cu kier tuma over e timon.

Durante un reunion general na sede di MEP a dicidi cu Susanne Sint Jago lo bira e presidente di partido halando asina un banda Valentino (Junior) Arends cu lo bira tesorero. Frank Briezen ta bira secretario y Joe Koolman ta sigui atende "asuntonan international" di MEP.

Pa aclarea cualkier malcomprendemiento, e ultimo funcion aki ("Asuntonan International") ta ensera e brainstorm, research y preparcion di posibel insultonan den direcion di politiconan di otro pais manera Ank Bijleveld y presidente di companianan international manera Bill Klesse di Valero.

Disgusto cu Palo di Bandera

Despues di a ricibi varios keho di simpatisantenan di AVP den e bario di Noord, Juan David (AVP) a dicidi di pasa den e bario aki pa wak ta kiko tawata pasando. Varios ta e habitantenan cu a keha over di e hecho cu niun di nan banderanan (grandi y chikito) no a sali bai vota dia 25 di september.

Esaki tawata manera un puñal den nan lomba y nan ta considera e acto cobarde aki di e banderanan manera un traicion di marca mayor. Nan a wordo poni contra cura, manda masha halto mes pa nan por disfruta di tur e biento cu Aruba tin di ofrece y toch nan no a sali masalmente bai vota.

Juan David di AVP a haña su mes obliga di tuma action di represalia contra e banderanan aki y kita tur di nan puesto pa hibanan den warehouse. Den e warehouse aki nan ta bai pasa 4 aña ta wordo indoctrina pa nan bai vota pa AVP den un sigiente eleccion. Esunan cu no cumpli lo wordo transforma den cas pa cacho, dak di cas of lo wordo usa como esclavo den trahamento di cas. Laga esaki ta un les pa tur e palo di banderanan cu no a cumpli!!

Nos no sa kiko lo bai para di esunan di partido MEP, pero nos ta teme pa nan bida.

Bola de Palo

Despues cu nan Bola de Cristal a cai kibra, e website di noticia E Informante a usa nan Bola de Palo pa haci e siguiente pronostico pa cu e resultado di eleccion.

Sigun mi algo a bai fout!!

Gobierno di Ultimo Ora (Part ??)

Cu e palabranan "Esaki ta mi danki", Sr. Nel Oduber a duna e pueblo di Aruba su agradecimiento pa no a sostene su partido pa un otro periodo di 4 aña den gobierno. Y manera ta comun den otro paisnan civilisa na mundo e lider di un partido cu a sufri un derota aplastante den un eleccion hopi biaha ta dicidi di accepta e mensaje cu pueblo a dune y ta tuma su retiro como lider y politico.

Den e caso aki Sr. Oduber ta accepta e mensaje di pueblo y ta dicidi di prop su programa di gobernacion di 4 aña den un solo luna. Di e manera aki e kier mustra pueblo cu su partido a cumpli maske cu ta te na final (letterlijk) di su gobernacion. Sr. Oduber a anuncia di ta bai cuminsa e proceso pa kita BBO y subi onderstand cu 50% y tambe di lo busca manera pa subi minimumloon.

Ademas di esaki e la promete di bai serca Madushi pa pidie pa e paga Awg. 2oo,000 of Awg. 600,000 (depende di cua partido bo puntra) bek na caha di gobierno pa nan invertie e placa aki den enseñanza, e lo pidi su jiu pa debolbe e arma y su permiso cu e tin pa carge, tambe e ta bai introduci un seccion di polis nobo (Cuerpo Especial Bobby Polis) pa asina e no tin nodo di insulta e polisnan normal di pueblo y ademas lo bira miembro di OPPA pa si encaso e mester insulta e miembronan den un futuro sercano e lo ta insultando su mes.

Na e manera aki Sr. Oduber ta duna bek na pueblo loke e merece na un manera cu cada politico rational lo hasi.

Resultadonan ta den

E resultadonan di eleccion 2009 ta den y un di e resultadonan individual di mas remarcable cu nos por a tuma nota di dje ta esun di Drs. Ing. Ir. Msc. VBA. STC. mr. KNO, OB/GYN Herbert Diaz MM kende a ricibi un cantidad total di 22 voto.

E resultado ta mustra nos pues, cu sr. Diaz tin mas titel cu e tin voto!

Usa bo derecho y vota cu common sense

Faltando solamente algun ora pa e stemlokaalnan habri, nos di PA kier a bira un tiki mas serio y pidi un y tur pa pensa bon riba tur loque a ser bisa durante e periodo di campaña aki, elimina e parti cu ta djies bla bla bla, y kies bo candidato consientemente.

Nos ta spera sinceramente cu nos postnan por a habri wowo di algun y yuda den nan decision. Unavez cu e ganadornan di eleccion wordo eligi, nos lo sigui cu nos postnan full force!!

Be pending!

Race Against Time

Faltando apenas algun dia pa eleccion 2009, candidatonan di tur partido ta hasiedo todo por todo pa logra convence mas hende cu ta posibel pa vota pa nan. Akinan un resumen chikito di e tacticanan cu diferente candidato/partido ta aplicando pa logra esaki.

Tin candidato cu ta hasie door di insulta latinonan, mientras cu su colega riba lista ta cana su tras ta disculpa pa e insulto na radio. Otro nan ta hasi lo imposible pa traha tempo pa nan papia cu y convence no menos cu 5 compania petrolero pa cumpra e refineria di Valero na Aruba. Tin un cu ta keda mustra un video di dje partiendo flor pa hende den caya....tur anochi. Otronan ta priminti e votador shelo y tera na ultimo momento. Y tin esun cu ta bishitando tur hotel aki na Aruba sperando cu e lo haña e sosten necesario di tur departamento (Hyatt, Holiday Inn, Riu Hotel, Renaissance Hotel). Nos ta spera cu e logra pasa tur e otro hotelnan aki na Aruba prome diabierna. Y por ultimo tin algun cu ta masha formal mes y ta pidi sosten di trahadornan di gobierno masha netjes mes via un carta.

Lasonan "estrecho" cu partners

Ora ta papia di turismo, dos nomber ta bin na mente cu ta e politiconan Otmar Oduber (AVP) y Edison Briesen (MEP). E dos politiconan aki a sa di converti nan mes den e expertonan politico riba e tereno di turismo. Y ta pesey no ta nada straño cu tur dos ta papia constantemente over di estrecha lasonan cu tur partners riba e tereno aki.

Tin cu bisa cu sr. Oduber y sr. Briesen ta hasiendo un tremendo trabow den esaki e ultimo simanan door di estrecha mas cu por e lasonan cu Carnival Cruise Lines. E lasonan aki ta asina estrecho cu Carnival Cruise Lines awo hasta a hañe ta manda tur sorto di carta (1, 2, 3, 4) pa zowel Oduber y Briesen pa purba di aclarea e eventonan cu a sosode durante e meeting cu lo tawata tin of no entre Carnival Cruise Lines y AVP.


Well nos ta sigur cu tur dos politico ta sumamente satisfecho cu nan logro di a pone Aruba na top atrobe di discusion international y cu despues di e eventonan aki Carnival Cruise Lines lo ta ainda mas ancioso pa cuminsa hasi business lo mas pronto cu ta posibel cu un pais asina professional y serio manera Aruba.

Danki Sr. Oduber y sr. Briesen pa boso esfuerzonan asina valioso.

Priorities, priorities, priorities

Nos di PA ta contento pa wak cu hasta durante e ultimo dianan di su careda politico, Minister Rudy Croes ta druk bezig cu leynan di sumo importancia y prioridad pa nos dushi pais sigui bai dilanti. Por ehempel e ultimo ley cu a wordo introduci pa registra cachonan brabo.

Pa malasuerte di e cachonan, nan no por vota paso si no esaki lo a bira otro ley pa e laachinan di departamento di justicia mescos cu hopi otro.

Abduction di nos Prome Minister

Despues di a scucha Sr. Nel Oduber su comentario (scucha rond di minuut 3 di e video) riba e apertura di BBA Bank siman pasa nos a keda masha straña. Paso esaki no por ta e mesun persona cu a bringa cu alma y curpa contra introducion di Digicel na Aruba pa por a kibra porfin e monopolio di Setar (Lesa gobierno). Despues di tal declaracion nos a keda cu un solo pregunta:

Ken e meneer aki ta y kiko e la hasi cu nos prome minister?

Insulto di Marca Mayor!!

"Esaki ta un INSULTO DI MARCA MAYOR di un prome minister pa cu su pais." Esaki tawata parti di e articulo cu a sali den Awe Mainta di 12 di september 2009 criticando formalmente e hecho cu Sr. Nel Oduber a saca un propaganda politico riba un pagina completo den tur corant un dia anterior caminda por a mira e bandera di Aruba na candela.

E articulo ta bisa cu e anuncio di MEP/Prome Minister a sali ayera den corantnan local y cu nos por observe riba pagina 25 di matutino Awe Mainta di e dia anterior y cu esaki ta un acto di desespera@#^!%!......warda warda. Reverse un rato....bo ta bisami cu e anuncio aki tambe a sali den mesun matutino AWE MAINTA e dia prome????

Nos ta kere cu e editor mester por tawata hopi cansa e dia prome cu e no a wak e anuncio aki (Reminder: Full Page) y cu ta te su sigiente dia e la ripara cu tin un bandera di aruba kimando den su matutino prestigioso. Sigur nan lo a ripara ora di cobra pa e anuncio aki. Ta con MEP por a pase un fast ball asina?

Politician

Esaki ta un reaction riba e post megalomania.

• pol·i·ti·cian
• Pronunciation: \ˌpä-lə-ˈti-shən\
• Function: noun
• Date: 1589

1 : a person experienced in the art or science of government; especially : one actively engaged in conducting the business of a government
2 a : a person engaged in party politics as a profession b : a person primarily interested in political office for selfish or other narrow usually short-sighted reasons

PA ta kere cu e definition ta papia pa su mes y ta recomenda wak e post megalomania cu e definition den mente.

Comerciante

Nos di PA ta un tiki confundi.

Algun luna pasa partido MEP a desenmascara e candidatonan di partido AVP como comerciante, pero awor nan a saca un comunicado di prensa den cual nan ta bisa cu nan lo a "gaña" cu nan ta comerciante pa haya un cita cu Carnival Cruise Lines.....

Ta con e cos ta awo?????

7 Minister den un Solo Edificio

Recientemente Mike Eman y partido AVP a duna un conferencia di prensa dilanti bestuurskantoor caminda e la priminti di lo trece tur 7 minister bek den un solo edificio. Esaki pa demostra union den gobierno y pa stop e huurmento di edificionan comercial di F&F.

Como cu e actual bestuurskantoor ta den un decadencia total y mester un facelift urgentemente esaki sigur no lo ta posibel dentro di algun aña. Pesey nos di PA kier a sugeri e sigiente edificio-/structuranan como un bon centro di gobernacion temporario cu ta cuadra cu e qualidadnan di nos gobiernonan di ultimo tempo.

1) KIA (esaki lo save hopi commuting time den un posibel futuro)
2) DUMP
3) PAAZ (idem dito)
4) CIRCO SUAREZ (ora nan bin Aruba nan ta tuma e 7 ministernan y ora nan bai nan ta bai cunan tambe te otro aña....posiblemente)

Impostor!!!!

Diabierna cu a pasa, Sra. Michelle Winklaar y Sr. Richard Visser a pasa bishita e trahadornan di Riu Hotel & Casino. Nan tawata kier a scucha for di boca di e trahadornan kiko ta nan preocupashonan, necesidadnan y kiko nan por cambia.

Mesora MEP a manda un emitido bisando cu Sra. Winklaar y Sr. Visser a gaña e gerente general cu nan a bin solicita como koki (Winklaar) y Activity Coordinator (Visser). Esaki ta parce di ta e modus operandi di AVP. Na momento cu nan a duna di conoce cu nan tawata di e partido oppositor e gerente general a bisa di tawata "outraged" y a core cu nan. Tambe e la remarca cu e mester por a ripara di trempan cu nan tawata impostor na momento cu Sra. Winklaar a pasa man pa un ice cream y come embez di traha un dessert pa nan por evalue.

Na su salida Sr. Visser no a keda sin menciona na e trahadornan cu subi trapi embez di usa lift tur ora ta bon pa salud y lo yuda AZV sali for di e problemanan financiero cu e ta aden na e momentonan aki.

Btw, nos ta wonder di con Sr. Visser despues di su debate historico cu Booshi Wever a dicidi di focus riba e sector turistico?

Megalomania

meg·a·lo·ma·nia [me-gə-lō-ˈmā-nē-ə, -nyə]: a delusional mental disorder that is marked by feelings of personal omnipotence and grandeur

Tactica di campaña

Comishon di Bon Boluntad ta un iniciativa di un grupo den nos comunidad kendenan ta preocupa cu e metodonan cu partidonan politico ta usa durante campaña pa haya voto.

Recientemente PA a haci un denuncia oficial contra Sra. Lainda Kemp, ya cu nos a haya evidencia cu e ta usando metodonan inacceptable pa convence hobennan Arubiano pa vota p'e. E pober hoben en cuestion lo keda traumatiza pa resto di su bida (of at least te ora e bira teenager).

Mira akibou y juzga pa bo mes; INACCEPTABLE!!

Analysis imparcial

Nos tur sa cu E Corant di Toko ta un di e tanto corantnan imparcial y di calidad halto cu nos pais por disfruta di dje. Den nan edicion di diasabra ultimo, nan a demostra esaki atrobe door di haci un analysis politico na unda e prome 10 politiconan riba cada lista a ricibi un cijfer.

Nos ta laga na bosonan pa guess cua ta e unico politico cu a haya un 10! Link




hint: e no ta un candidato di MPA, MEP, RED of PDR

Priorities

Nos di PA semper ta contento di mira noticianan cu ta demostra cu nos parlamentarionan ta bon al tanto di loque tin nos pueblo preocupa y ora cu nan ta pak aan e situacionnan aki. Diasabra ultimo nos por a tuma nota di un noticia alentador. Nos parlamentarionan a tuma un decision cu lo tin beneficio directo pa nos pueblo.

Nos parlamento a aproba e concepto di ley Ordo Libertador Betico Croes. Pronto nos pueblo lo por cuminsa aprecia su beneficionan; be pending!!

The Bigger the Better

Esaki aparentemente ta e lema di Otmar Oduber di partido AVP despues cu e la introduci un biaha mas su idea di bin cu un commuter airport na San Nicolas. E idea ta consisti di saca tur vuelonan "non jet" manera Tiara Air, vuelonan cu ta bin di Venezuela como tambe jetnan priva y manda esakinan pa San Nicolas Commuter Airport. Paso nos tur por wak con "Booming" e business ta den e area di e aeropuerto actual. Segun e calculonan di Sr. Oduber esaki ta alrededor di 100 pa 120 mil pasahero cu lo pasa atraves di e aeropuerto di San Nicolas.

Tur esaki segun Sr. Oduber su estudio intensivo di e proyecto aki ta bai causa un "Ripple Effect" na San Nicolas. Esey ta inclui cu taxinan tin cu bai San Nicolas pa hiba y busca pasahero ja cu awo hopi di nan ta bai baha un tiki mas lew di nan destino. Esaki lo causa un "Ripple Effect" den e saco di e pasahero cu awo tin un paga un tarifa mas halto pa wordo baha na Playa of e hotel area.

Tambe no por kita afor cu algun Arubiano lo kier traha un botique hotel den e area di San Nicolas. Esaki apesar cu tur experto na Aruba ta di acuerdo cu nos no mester di mas hotel na Aruba. (Puntra Juan David bijvoorbeeld.) Sr. Oduber ta kere cu mester bin 3 pa 4 di e tipo di hotelnan aki.

E unico pasaheronan cu nos por pensa riba dje cu lo ta contento cu e aeropuerto aki ta e trahadornan di e barnan na San Nicolas cu cada 3 luna ta jega. Y esaki somehow ta duna e frase di Sr. Oduber "Ripple Effect" un significacion totalmente diferente.

Monica un Biaha Mas ta Loop Achter

Den e edition di 27 di Augustus di Awe Mainta nos por a lesa un articulo di Monica Kock, lider di partido MPA, caminda cu e ta gaba cu MPA atrobe ta inovativo. Segun Sra. Kock, MPA semper ta bin cu idea inovativo pa jega mas serca di su pueblo y esaki a wordo subraya un biaha mas awo cu e tin su mesun Radio Talkshow caminda pueblo por comunica cu ne mas facil.

No ta prome biaha cu Sra. Kock di partido MPA ta cana achter de feiten na. Na varios ocacion den pasado nos di PA a ripara cu Sra. Kock semper ta reacciona riba un issue politico 2 pa 3 siman despues cu esaki tawata un "issue".

Pero cu e ultimo noticia aki Sra. Monica a bai demasiado lew!!! Acaso Sra. Kock no a ripara cu AVP y MEP ta waaaaaaayyyyyyyyy ahead of you? Pa añaaaasss caba AVP tin su estimado canal 90 cu e programma mas scucha na Aruba:"Pueblo na Palabra". MEP tampoco a keda atras y a join un par di aña atras cu nan mesun radio emisora Top FM cu nan programacion di bon calidad informativo.

Cu e Talkshow aki caminda ta duna informacion na e radioyentenan, MPA no ta convence niun hende (sigur no nos di PA) di nan inovatividad.

Debati a la AVP

AVP ta priminti di bin cu un cambio den politica na Aruba. Ta parce cu AVP lo a tuma tur e cursonan nececario pa logra e objetivo aki cu exepcion di esnan pa sinja debati. Uno ta sinta den un sala duna converencia di prensa dilanti periodistanan di cual mayoria no ta hasi pregunta critico y sinta critica bo contrincante bai gol. Otro ta forma parti di un debate publico cu bo contrincante caminda bo tin cu substantia bo ponencianan. Un biaha mas PA por a nota ayera nochi na e presentashon di Richard Visser den e progamma di Lacle & Trappenberg, despues di e no show den e programma anterior, cu di debati AVP heeft er geen kaas van gegeten. Como cherry riba e bolo despues cu na mesa Richard no tabata tin e respuestanan adecuado pa fortaleze su poniencian, ela dicidi, despues di a slaap er een nachtje over, pa responde Booshi cu e fervor cu nos a custuma di dje, pero helaas too little too late.

Pero e cambio ta na caminda! Nos ta verwacht cu superheroe Mike ya caba lo ta colgando na telefon su colega Jan Peter pidiendo e tur e grabashonnan di e programmanan Pauw & Witteman y Buitenhof caminda un politico di CDA a presenta aden.

The Right Man in the Right Place??

Aunke e intencion principal di PA ta pa focus riba nos politica na Aruba, de bez en cuando nos ta focus tambe riba e otro participantenan den e proceso politico aki na Aruba. Por ehempel nos prestigioso prensa.

Hopi corant aki na Aruba ta wordo tilda di ta simpatisa un of otro partido politico. E corant Awe Mainta por ehempel ta wordo tilda di ta simpatisa cu partido AVP. Y pesey nos di PA a keda sorprendi na momento cu dia 26 di Augustus e corant aki a publica un articulo masha positivo riba e nobramento di Derrick Werleman como hefe di departamento di finanza. Segun e articulo e nobramento aki ta "na su lugar" y cu Sr. Werleman ta "The Right Man in the Right Place".

Dos dia despues (27 di Augustus), e mesun corant aki ta bira mundo riba su cabez y ta publica cu segun fuentenan den departamento di Finansa "E nombramento di D. Werleman como director di Finansa ta otro nombracion politico pa yuda Nilo Swaen tapa su mal maneho financiero". Segun e articulo, Sr. Werleman ta defende y guia Sr. Swaen su mal maneho. Ademas Awe Mainta ta cuestiona ta con porta cu un persona cu apenas un par di aña atras a drenta den servicio bow Sr. Swaen, "sin diploma" y sin nunca a fungi como hefe ta wordo promovi asina liher.

Den defensa di Awe Mainta, ta dos diferente persona (posiblemene cu otro preferencia politico) a skibi e dos articulonan aki. Esaki ta bisto na e manera cu uno a skibi Finansa cu "Z" y e otro cu un "S".

E Politico y su Experticio

Tin varios politico riba listanan pa cu e eleccion benidero cu tin un experticio riba un of mas tereno specifico. Y ta hopi bisto con nan ta profila nan mes como tal tambe door di hopi biaha skibi articulonan specificamente riba e un of mas terenonan ey so. Un caso notable ta esun di Willem Vrolijk di MPA cu na varios ocasion a skibi articulonan over di su experticio riba tereno di aviacion of mas specifico nos aeropuerto.

Tuma por ehempel e articulo cu a sali dia 19 di augustus riba 24ora caminda cu e ta papia di nos radar y espacio aereo. Den e articulo menciona Sr. Vrolijk ta usa un cantidad di terminologia hopi technico cu poco hende na Aruba ta comprende, pa asina convence e publico di su experticio.

Pero Sr. Vrolijk no a keda te ey paso e ta mustra di kier expande su experticio riba otro terenonan tambe. Recientemente Sr. Vrolijk a cuminsa tuma cursonan intensivo riba tereno di telecomunicacion. Y prepara boso ora e cuminsa lanza algun articulo cu terminologianan manera "Blackberry Edge", "Curve", "Bold", "WI-FI", "Call Waiting", enz.

Cambio --> AVP = MEP

Durante e campaña aki, practicamente tur partido a copia Sr. Barack Obama su lema di "Change". Lastimamente den algun caso nos por a constata cu ela keda solamente na e uso di e lema y no na accion. Awor porfin nos por a constata un partido cu si a keda na su palabra. Na momento cu e programa "Lacle & Trapenberg" (cu topico "BBO y su futuro") a bai den aire na Telearuba, nos a nota cu partido AVP a cuminsa e "cambio" awor caba.

Minister Swaen tabata presente; Sr. Roos di KvK tabata presente; Sr. Marapin di SER tabata present; y Sra. Wever-Croes di MEP tabata presente. Lamentablemente, Sr. Trapenberg mester a anuncia cu e ultimo invitado, Sr. Lee di AVP no tabata presente na e show. E motibo cu a wordo duna di banda di AVP ta cu "...nos lider Sr. Mike Eman a reta Minister Oduber na un debate over di BBO, por lo tanto Sr. Lee no lo presenta pa papia over di e topico aki tanten cu e debate aki no tuma lugar."

Aki nos por nota cu e cambio cu partido AVP ta papiando di dje ta un metamorfosis di partido AVP pa bira partido MEP. Nos tur por corda con partido MEP nunca ta participa na debatenan politico "..te ora cu AVP splica unda e placa di Interbank a bai, unda e placa di FDSN a bai etc etc...". AVP ta well on their way pa un metamorfosis completo.


ps. obviamente partido MEP a have a field day cu e ausencia di Sr. Lee.

Un estudio comparativo entre Carnaval y Campaña electoral

Siguientemente PA ta presenta un estudio cu lo compara e gran festival di Carnaval cu un di e momentonan di mas importante pa un pais democratico; Eleccion y su campaña.

Kiko?	Carnaval	Campaña
Composicion musical	✓	✓
Parada	✓	✓
Music trailers	✓	✓
Transmision en bibo	✓	✓
Fiesta colorido	✓	✓
Multitud para banda di caminda	✓	✓
Cabez y Rabo ta 3 ora leu for di otro	✓	✓
Bailamento	✓	✓
Hobennan pa nan cuenta	✓	✓
Drispidimento di placa	✓	✓
Controversia	✓	✓
Consumo excesivo di alcohol	✓	✓
Pelea	✓	✓

Awor e unico cos cu nos mester warda riba dje ta pa Juni 2010 yega pa wak si nos tin un baby-boom, ya e ora tur e baby nan ey lo wordo declara como "Campagne-kindjes".

E similaridadnan ta suficiente pa PA conclui cu aki 4 aña, nos mester richt op SAVC (Stichting Arubaanse Verkiezings Campagne).

Wantamento na Liña

Diabierna cu a pasa por a tuma nota cu candidata # 16 riba lista di MEP den persona di Susanne Sintjago a lanca su website durante un reunion di contacto. Nos di PA di biaha a core bai wak kiko tur e website aki ta brinda di informacion tocante e candidato, su vision, su motibonan pa drenta politica y su planan pa Aruba.

Riba su homepage nos por a lesa cu Sra. Sintjago a pasa masha dificultad pa haña trabow ora e la bin Aruba na Februari 2008. Esaki apesar di su estudio di nivel halto na Merca, Canada y Trinidad. Segun su website, ta e dificuldad aki a impulse pa drenta politica pasobra como hoben cu termina bo estudio bo tin derecho di haña trabow. Apesar cu e ponencia aki ta contradeci e ley di "Vraag en Aanbod", laga nos repasa e dificultad enorme cu Sra. Sintjago a pasa aden pa haña trabow.

Segun e articulo "Berdad nunca a perhudica ningun hende, ningun causa ni ningun nacion" riba su website e proceso frustrante y largisimo a cuminsa na Februari 2008 caminda cu e la aplica como Beleidsmederwerkster na Directie Economische Zaken. Nos tin cu nota akinan cu ta na Februari 2008 tambe Sra. Sintjago a caba su estudio. Su prome entrevista cu e directora di Economische Zaken tawata na 7 Maart 2008. Despues menos cu dos siman e la haña su di dos entrevista dia 19 di maart cu e cabesante di Buitenlands Economische Betrekkingen. Tur dos entrevista tawata tin un resultado positivo y pesey su papelnan por a wordo manda pa e minister concerni firma.

Segun e articulo aki cu a wordo skibi na Juli......(lesa bon) 2009 su papelnan a keda cla dos siman prome pa e por cuminsa traha. Berdad, e proceso aki ta ridiculamente largo, pero warda...... E dos entrevistanan mes a tuma alrededor di 1 luna di tempo. Loke a tarda hopi (mas cu un aña) ta e "firmamento" di e papelnan, pues loke na Aruba nos ta yama "Wantamento na liña". Pues e problema ta sinta mas den e gana/timing/razon cu e minister concerni tin pa firma e papelnan necesario pa sra. Sintjago por cuminsa traha. Y ta pesey bo a drenta politica y hustamente partido MEP cu ta e partido na mando pa drecha e situacion aki. Ok, ok, awo bo razon pa drenta politica ta hopi mas duidelijk.

Un grupo vulnerabel

Awor cu PA ta activo riba Facebook, nos por a tuma nota di un politico cu no a lubida un grupo cu ta pasando den temponan dificil, pero cu hopi biaha ta ser lubida. Ta e politico Juan David "Curashi" Yrausquin kende riba Facebook a ricibi e siguiente pregunta:

Como hoben comerciante y politico, cua ta bo vision pa diversifica e economia di Aruba?

JD a contesta:

Locual mi ta menciona ta cu Aruba mester atrae companianan multinational pa establece nan regional head office na Aruba. Tur e companianan aki actualmente tin un oficina den region, nos mester percura pa e ta na Aruba. Esaki lo crea trabaonan na un nivel mas halto, entradanan cu ta bale la pena y lo crea spinoff effect tambe pa companianan di accountant, abogado, notario y bankonan.

Ey ta Curashi!! E pober accountant, abogado, notario y bankero ta pasando den temponan dificil awor cu e crisis economico, y niun hende ta para pa nan. Como ehempel, recientemente nos por a tuma nota di un abogado cu tabata coriendo den un BMW X5 2009 pero (y mi gemoed ta yena djies skirbiendo esaki) SIN e optional CD/DVD player y SIN e heated headrest option. Ta con nan por sigui biba asina?!?!

Well, JD "Curashi" Yrausquin lo percura pa nan haya un "spinoff effect" y por para back riba nan mesun pia.

Nos a tuma contact directo cu Departamento pa Asuntonan Social y nan a splica nos cu enberdad nan a tuma nota di e situacion aki y cu nan a lanta un fonds special pa e grupo vulnerabel aki pa asina nan ta prepara pa cualkier eventualidad.

PA riba Facebook

PA tambe ta sigui e ultimo trendnan den communicacion dus lo tabata inevitabel cu PA tambe lo a subi Facebook un dia. Pa medio di Facebook PA lo scan e arena politico online caminda e politiconan y e votadornan ta intercambia preguntanan y comentarionan cu otro. E preguntanan y comentarionan mas notabel PA lo post tur siman den un seccion nobo yama "Pregunta critico di siman". Ya den e prome dianan riba Facebook, PA por a lesa algun preguntanan critico manera "ki ora e parada ta sali?" y tambe "tin t-shirt pa mucha tambe?". Ya por a nota cu e votadornan ta sumamente preocupa cu e futuro di Aruba y ta busca tur informacion pa nan hasi un voto educa durante e eleccion venidero.

Nos lema riba Facebook lo ta:

Politica Arubiano riba Facebook, na unda tur politico ta "Friends" di otro...

E Arma Secreto di Mervin Wyatt Ras

Awe nos por a tuma nota di un noticia sumamente positivo pa e campaña di sra. Mervin Wyatt Ras. Ta asina cu awe team Mervin a lanta un billboard sumamente grandi y bunita riba e caminda principal entre Savaneta y San Nicolas. Cu e borchi aki Sra. Wyatt Ras ta garantisa un resultado positivo pa cu su campanja ja cu segun nos por comprende e borchi aki magicamente ta converti tur persona cu pasa riba e caminda grandi aki den un votador pa e candidata. Esaki ta solamente posibel si e borchi ta grandi suficiente pa e por ehecuta su poder hypnotico riba e persona cu keda mira e borchi aki.

Nos a purba di confirma e ponencia aki door di busca informacion tocante e correlation entre cantidad di plywood usa durante campaña y cantidad di voto adquiri, pero lastimamente CBS no tawata tin e datos aki.

Sra. Wyatt Ras ta adverti cu lo tin mas di e borchinan di e tanjo aki full rond di Aruba. Na e manera aki e por ta sigur cu e lo hanja un cantidad enorme di votador pa dia 25 di september.

Ley Contra Enriquecimento Ilicito

Durante siman nos por a lesa un ley hopi interesante cu RED ta propone pa introduci asina cu nan drenta gobierno. Ta asina cu na December 2007 RED a entrega un mocion cu a keda aproba unanimamente unda ta pidi gobierno pa ehecuta mas pronto cu ta posibel e Ley di Financiamento di partido politico. E partido RED ta convenci cu aplicacion di e ley aki lo yuda reduci e actonan di coruption den nos gobierno.

Tambe RED kier introduci e ley contra enriquecimento ilicito di funcionarionan publico. Esaki kiermen cu un gobernante mester declara prome cu e sinta e priopiedadnan di dje, su casa y jiunan. Ora e baha for di su funcion e mester declara esaki atrobe pa asina por verifica si no tin enriquecimento sin cu por hustifica esaki a base di e salario di e gobernante.

Ademas, RED como un partido cu base religioso lo kier pa tur minister declara prome cu nan asumi nan funcion cuanto jiu legal nan tin y despues cu nan baha for di nan funcion. Asina por wak si no tawata tin foul play durante cu nan tawata minister. Esaki ta hopi importante pa wak si e minister tawata un bon ehempel pa su pueblo.

Vision y Mision

Xiomara Maduro ta candidato nr. 9 riba e lista di MEP. Sra. Maduro a dicidi di comparti cu nos su Vision y su Mision pa cu e proximo 4 añanan. Haciendo esaki, ela percura pa e ta mas specifico y detalla posibel y no a duda na ningun momento di haci esaki, ni maske cuanto palabra e lo a tuma. Manere nan ta bisa den bon papiamento: den placa chiquito....

Lesa e splicacion eloquente di Sra. Maduro akibou y bisami cu bo no ta compronde precies kiko e ta bai haci.....

Vision
Un Aruba uni na unda tur hende tin e oportunidad pa ta excelente den locual e ta haci.

Mision

Crea oportunidad, inspira y motiva su pais pa haci bon uso di e oportunidad nan aki.

Problema di AZV Resolvi den 3 Stap

Hoerraaaa......Si asina mes. Ta cu hopi enthousiasmo nos di PA a lesa e articulo di Sra. Merrel Curie di MPA caminda e ta elabora riba e 3 stapnan cu ta necesario pa elimina e deficit di AZV y logra un cuido di nivel pa Aruba.

Sra. Curie por wordo mira como e specialista di cuido medico riba e lista di MPA. E la cuminsa enfatisa cu hopi ideanan di profesionalnan riba e tereno di salud no ta tene cuenta cu e factor di "tempo", pasobra hopi biaha enfermedad no ta warda riba e solucion. (Nos tin cu agrega na e frase aki cu casi casi e la make it pa "Frase di siman".)

Sigientement e la elabora riba e 3 stapnan necesario pa resolve e problema cu yama AZV:

Stap 1: Profesionalisa e administracion, directiva y organo di supervision di AZV na tur nivel a base di "Good Governance" pa e instancia aki funciona eficientemente y responsabel. Waw, y pensando cu tur e tempo aki e solucion tawata dilanti nos nanishi!!

Stap 2: E stap aki ta consisti di introducion di un asina yama "Electronic Health Information Technology". E systema aki ta suppose di evita gastonan innecesario door cu e ta registra tur e historia medico di cada cliente. Porcierto, cu gastonan innecesario Sra. Curie no kiermen e inversion miyonario di tal systema. Tambe e la duna un ehemplo di un paciente cu a caba di hasi un test di sanger pa su huisarts y despues di 2 dia e ta bai su internista cu tambe ta lage hasi un test di sanger. E systema electronico aki lo evita cu e internista bolbe laga hasi un test di sanger siendo cu 2 dia anterior e pacient a hasi uno caba y asina ta evita gasto extra pa AZV. Na Hulandes e systema aki yama "Electronische Anti-Verkalking Systeem" y ta wordo usa specialmente pa e pacientnan cu tin verkalking pisa cu no ta corda loke nan a hasi 2 dia pasa!!!!

Stap 3: Busca forma di entrada adicional. Akinan sra. Curie a menciona por ehempel intercambio di expertisio medico. Well, mi no sa sigur over di esaki pero un experticio cu sigur nos por exporta specialmente pa merca den nan discusionan over di e Health Care Plan di Obama lo ta: "Obama, don't do it!!!!!" Tambe Sra. Curie a menciona medical tourism y cooperacion regional di cual e prome tin hopi potencial sigur mirando e cantidad di turista cu ta confronta atraco, hit & run, propeller di boto riba nan cabez, kidnapping y bringamento.

Anto ken a bisa cu nos politiconan no tin solucion pa e problemanan di pueblo?

Benny pasando den un fase di Acceptacion

Benny Nisbet ta un di e politiconan cu mas tanto aña tin ta encabesa un partido aki na Aruba y por bisa cu e lo mester tin un experiencia masha amplio mes. Mester bisa si cu e ultimo dianan aki Sr. Nisbet ta pasando den un fase psychologico pa accepta e hecho cu e su partido no ta e partido di temponan aya mas.

Poco siman atras Sr. Nisbet a cuminsa ta keha over di e hecho cu tur aña e tin cu recorda CENSO cu no ta posibel pa e parido PPA jega na tempo mainta trempan na Havana Club pa entrega lista. Esaki paso e tin cu organisa su caravana di auto pa bin te for di San Nicolas y esey no ta logra prome cu e ora stipula pa CENSO. Esaki no ta combini PPA pasobra entregamento di lista acompaña pa un caravana di 5 auto ta pita y hasi buya ta garantia pa saka maske ta un asiento!!

E biaha aki Sr. Nisbet a dicidi di keha over di e hecho cu como partido cu no tin representacion den parlamento e tin cu haña 513 firma di sosten di pueblo pa por participa den eleccion y cu esaki no ta democratico. Humm, pero esaki no mester ta algo straño pa Sr. Nisbet paso desde 1989 na 3 ocasion caba PPA no a logra asiento den parlamento y ta suppose di ta familiar cu e proceso aki. Y nos no ta corda cu esaki tabata un issue durante eleccionan anterior.

En fin nos ta compronde cu Sr. Nisbet tin cu pasa den tur e fasenan psychologico aki y cu su sigiente fase ta e fase di "Desaparicion". Esaki ta esun cu e tambe ta custumbra di pasa aden specialmente despues di resultado di eleccion.

Frase di Siman: Inversion cu Beneficio

Awe riba 24ora nos por a lesa un articulo di sr. Rene Ridderstaat caminda cu corectamente e la enfatisa cu Enseñanza ta un "Inversion cu Beneficio". Esaki contrario na e otro "inversionnan" cu pueblo a mira ultimamente di e gobierno actual caminda cu tin hopi pregunta ta na unda e parti di "Beneficio" a keda.

Danki Sr. Ridderstaat pa aclarea (descubri) pa nos cu berdad un inversion ta suppose di tin su beneficio! Esey kiermen cu nos ta riba bon caminda.

Fanfaria no ta trece solucion

Ta berdad!!! Porfin un lider politico cu ta trece e punto importante aki dilanti cu niun otro partido ta durf di bisa. "Fanfaria no ta trece solucion. Solucion ta bin solamente door di accion y traha duro den parlamento y gobierno". Esaki ta e palabranan di Sra. Monica Kock di partido MPA na introduccion di candidatonan di su partido politico diasabra cu a pasa.

Y ta pa e motibo aki MPA a kies pa hasi algo diferente durante presentacion di su candidatonan door di trece e banda "Prive" pa toca pa nan,...cu porcierto segun nos por a lesa a causa FUROR cu un cancion special cu nan a compone pa MPA. Ricon Boys tambe a compone un cantica masha "HOT" mes pa MPA cu "Bone" mes mes a canta "Live" riba stage. Y varios candidato cu sigur tampoco ta sostene ningun fanfaria cu no ta trece solucion tambe a presenta nan jinglenan hopi "CATCHY" durante nan presentacion.

Pa finalisa e anochi, tur e candidatonan y esnan presente a marcha y protesta fuertemente contra "Fanfaria". Riba e potret akibow ta caminda cu e multitud a sali for di man y a cuminsa baila al estilo "Conga" pa uni forza contra e fenomeno diabolico aki. Nos ta contento di por informa cu dank Dios no tawata tin niun herido durante e protesta aki.

Mi Salud - Mi Futuro

Nos por a tuma nota di un anuncio cu a sali den corantnan local awe. Richard Visser, candidato number 9 riba lista di AVP ta organizando un movie night durante cual lo pasa e pelicula Twilight y durante cual nos hobennan (kendenan ta wordo invita pa bin "chill un rato cu bo amigonan") por disfruta di popcorn y refresco GRATIS.

Lagando un banda e pregunta di mas obvio (dicon net un pelicula di vampiro), nos di PA ta admira Sr. Visser pa duna back na comunidad y vooral tambe pa regala nos hobennan productonan saludabel manera popcorn y refresco, guiandonan asina pa hiba un bida mucho mas saludabel.

Go PUMA!

BBB ???

Siman pasa por a lesa riba 24ora e grato noticia cu Aruba a ricibi un rating di BBB pa e compania "Fitch Ratings Ltd" cu ta un international rating agency. Pero kiko esaki kiermen exactamente?

Well, segun nos por a comprende for di internet, Fitch Ratings ta rate companianan of institutonan (den e caso aki e pais Aruba) riba nan capacidad y stabilidad financiero pa por paga su prestamonan. Por ehempel, si Aruba (lesa gobierno) kier presta placa riba mercano international (por ehempel for di un banco na Swiza of Merca) y Aruba tin un AAA rating esey kiermen cu e banconan aki por tin siguransa cu Aruba lo paga bek e debe aki sin problema. Kiko un rating di BBB kiermen anto? Segun e mesun source: "medium class companies (..lesa den e caso aki Aruba), which are satisfactory at the moment".

Wel tur esaki ta zona masha complica y bisabo berdad mi no ta kere cu hopi di nos Arubianonan lo comprende esaki ni ta interesa. Pues, e ingredientenan perfecto pa nos politiconan hasi uso di e noticia aki pa...laga nos bisa "informa" nos pueblo di e bon trabow cu nan ta bin ta hasiendo. Pasobra Sr. Nilo Swaen tawata sumamente satisfecho di por a raporta cu e rating aki ta demonstra un biaha mas e confianza cu Fitch Ratings tin den e maneho di e gobierno di Aruba apesar di e crisis economico. Tambe e articulo ta indica cu Aruba pa prome biaha den historia a logra un surplus fiscal na 2008 debi na e areglo di Plant Hotel cual fondonan pa un gran parti a wordo usa pa paga debenan di gobierno. En fin, tur cos ta mustra masha bon pa gobierno di Aruba.

Pero laga nos wak un rato kiko MAS tin skibi den e raport di Fitch akinan cu NO a wordo menciona pa nos ministro di finanzas. Esaki debi na e scarsedad di tempo di e ministernan, nan ta custuma di lesa e prome par di zin so. Manera por ehempel cu e rating cu Aruba a haña ta basa pa gran parti riba nos relacion cu Reino Hulandes.....cual e gobierno di MEP ta parse di ta undermine constantemente. Well ok, kiko mas? E raport ta menciona lo sigiente: "Aruba's rating is constrained by its narrow economy, lagging growth performance, structural weaknesses in public finances including a high level of budgetary rigidity and a higher public debt burden compared to the BBB median". Mi no ta kere cu mi a wak esaki menciona den e articulo di Sr. Swaen.

Tambe e raport ta menciona cu tur e surplus cu Aruba a logra na 2008 (cu porcierto tawata eenmalig door di Plant Hotel) lo wordo reversed e aña aki door di entre otro perdidanan di AZV y un deterioro di e finanzas di e APFA. Well esaki tampoco no ta mucho positief pa e gobierno aki. Humm, mi mester por a skip e informacion aki den e articulo di Sr. Swaen.

E punto mas importante den e raport di Fitch ta cu nan ta kere cu Aruba lo mester implementa "medidanan" decisivo pa evita e deterioro fiscal di e pais. Esaki segun Fitch no por ta problema paso segun nan e rating cu Aruba a haña tambe ta basa riba e feit cu Aruba tin un "Relatively high per capita income of over USD 20,000. Kiko esey kiermen? Esey kiermen cu mientras e pueblo tin placa pa sigui paga belasting (y otro medidanan cu posiblemente ta na caminda) pais Aruba lo por sigui paga debenan sin problema y pues Fitch ta mas cu contento pa duna nos un "BBB".

Porcierto nos a busca e significacion di "BBB" tambe den woordenboek Hulandes y eynan e significa "...en wij maar betalen".

Ken e ta imitando?

Booshi Wever MEP: Cuarto bate

|
|
|

Jose Canseco Ex-MLB: Cuarto bate

mas evidence

Booshi Wever MEP

|
|
|

Jose Canseco Ex-MLB