Facebook

Hopi ta e politiconan cu a mira IT como un instrumento hopi importante den nan campaña pa aserca mas hopi hende cu ta posibel. Den e eleccion di 4 aña pasa caba nos por a mira hopi politico cu a lanza nan mesun website caminda nan tawata por a distribui nan mensaje politico na un publico mas grandi. Pa e campaña 2009, Facebook a bira e instrumento technologico di choice pa algun politico aki na Aruba. Claro cu tur e technologia avanza aki no ta bin sin su consequencianan negativo como entre otro hacking.

E prome victima politico cu su Facebook a wordo ge-hacked (5 juli, 2009) tawata Andin Bikker di partido PDR. Sr. Bikker a perde 1,300 "Friends" riba e dia tragico aki cu tawata pa colmo net un par di dia prome cu nan Online Town Hall Meeting lo mester a tuma lugar.

Dia 15 di juli 2009 Awe Mainta a publica cu e sigiente victima di "Facebook Hacking" tawata Alex Tromp di partido AVP. Na momento di e susedido tragico aki Sr. Tromp tawata tin casi 1,000 "Friends" cual awo e no por papia cu nan mas.

E ultimo victima di "Facebook Hacking" tawata Willem Vrolijk di MPA. Akinan e hacker(nan) a hasi algo diferente. Enbez di sabotea e website nan a dicidi di add varios pregunta pa esunan cu ta maneha e site. Sr. Vrolijk parse no a nota esaki y a hasi un conferencia di prensa usando e material aki. Sr. Vrolijk tambe a keda sumamente contento cu su miles di "Friends" nobo cu e la haña riba Facebook cu ta parse di ta sostenenan 100%.