Proceso Electoral di Aruba

Manera PA a anuncia un par di siman atras e partido MSI lo a keda oficialmente for di eleccion 2009 pa motibo di no a registra prome cu e deadline pa partidonan nobo. Esaki riba su mes ta un lastima paso nos di PA lo kier mira mas hendenan "bon" prepara y cu "vision" drenta arena politico. E ultimo aki no ta conta pa MSI si cu a mustra te ainda di ta "mal" prepara y sin "vision" paso drenta arena politico no mester ta algo ad-hoc pero algo cu bo mester a pensa riba dje hopi prome caba y sa precies kiko ta e requisitonan. MSI a MIS de boot.

Pa compensa e falta di preparacion y vision, Edwin Duineveld (lider di e partido nobo) ta mustra cu si e tin otro cualidad pa ta un politico na Aruba. Y e cualidad aki ta "creatividad". Pa toch participa na e eleccion na september benidero MSI a usa su creatividad y a aserca Gemby. No, esaki no ta pa Gemby join su partido! MSI kier usa e partido OLA, cu si a participa na eleccion di 4 aña pasa y consequentement no mester registra, como su vehiculo pa participa na eleccion 2009.

Te con lew nos sa e areglo ta inclui cu Gemby mester distancia su mes di e partido OLA. Sr. Duineveld di su banda mester distancia su mes di cualkier "Goodwill" cu e partido OLA tin di tempo di su gloria. Esaki ta ensera cu Sr. Duineveld no mag di usa e sigiente ideanan politico, cu tabata e trade-mark di Gemby su tempo, pa e campaña 2009 (dijs pa menciona algun):
1) Petroleo Barata di Venezuela
2) Contracto cu Fabela
3) Projecto Radar
4) Lucht- en Zeebrieven

Claro cu e intercambio aki (si nos por yame asina) ta bai zorg pa un bruhamento formal dia di eleccion. Paso tur persona cu kier vota pa MSI na september lo tin cu vota pa OLA riba e stembiljet. Segun Censo, nan ta prepara pa esaki ya cu nan a hanja conseho professional riba e asunto aki. Porta ta ami, pero mi ta scucha "Re-count Bells" caba.

Esaki ta un bon momento pa nos introduci un chart nobo di PA. Laga nos bai wak e calidad y profesionalismo di nos proceso electoral na Aruba.